Si u kryen vrasjet e organizuara në Kosovë nga sektori i vrasjeve të SHIK-ut?

Kosova është tronditur nga rrëfimet rrëqethëse për vrasjet e kryera në Kosovë. Për të gjitha vrasjet dhe tentim vrasjet e kryera në Kosovën e pas luftës, ka filluar të zbardhet misteri, të paktën për 17 prej tyre, gjithë[ka është zbardhur nga vetë dorasi, apo pjesëmarrësi në ekzekutime, Nazim Bllaca.

Vetë njëri nga autorët e vrasjeve makabre të pas luftës në Kosovë, ish-luftëtari i UÇK-së, pjesëtar i SHIK-ut, që nga periudha 1999-2003, Nazim Bllaca, ka pranuar të dielën të dal me fytyrë, pa maskë dhe pa asnjë mbrojtje, të rrëfej publikisht për të gjitha vrasjet dhe tentim vrasjet të kryera në Kosovë, për të cilat di ai dhe në të cilat ka marrë pjesë, i urdhëruar nga strukturat udhëheqëse të SHIK-ut, kryesisht nga Azem Syla dhe burri i mbesës së tij, Shpresim Uka, ky i fundit epror i Bllacës.

I lindur më 01.04.1972 në Ribar të Madh, komuna e Lipjanit, Nazim Bllaca, me profesion arsimtar, thotë se është kyçur në UÇK nga qershori i vitit 1998 deri më 12 qershor 1999, në Zonën e Pashtrikut. Pas lufte ai është inkuadruar në strukturat e SHIK-ut, si njeri i besueshëm dhe i bindur se në këtë mënyrë do t’i kontribuonte atdheut, derisa një ditë ai ka kuptuar se personat e etiketuar si shërbyes të UDB-së nuk kanë qenë të tillë, prandaj edhe kishte marrë vendim që në 2003-ën të braktisë strukturat e SHIK-ut.

Lista më ka ardhur nga eprori im Shpresim Uka

Në konferencë shtypi të dielën në Prishtinë, në pushimoren ndërmjet Kuvendit të Kosovës dhe të Prishtinës, e njohur si trerremëshi, ai ka deklaruar se në asnjë mënyrë nuk do të tërhiqet nga deklaratat e bëra në një rrëfim më shumë se gjysmë ore në DVD, (material ky që gazeta e boton të plotë në faqet 6-7), në të cilat ai drejtpërdrejt akuzon udhëheqësit e SHIK-ut dhe njerëz të strukturave qeveritare. Ndonëse nuk flet me emra se cilët janë personat që ai personalisht i ka vrarë, thotë se ka marrë pjesë në 17 raste, përfshirë këtu vrasje, plagosje, tentim-vrasje, kërcënime, rrahje brutale. Për vrasjet, thotë se për personat që ai i ka vrarë do të dëshmoj në Prokurorinë e EULEX-it. “CD që është dorëzuar në Parlamentin e Kosovës nuk ka të bëjë me periudhën e luftës, por për aktivitete që janë zhvilluar pas luftës. Kam qenë pjesë e strukturave të SHIK-ut dhe ajo CD i qartëson disa gjëra që janë manipuluar në adresën time. Epror kryesor në SHIK e kam pasur Azem Sylën, dhe aty kam shërbyer 4 vite, nga 1999-2003. gjatë asaj kohe i kemi pasur strukturat tona dhe veprimtaria është zhvilluar në shumë fusha. Është e vërtet se bëhet fjalë për vrasje në nivel Kosove. Ato që i ka përmendur Gani Geci ato janë të vërteta. Flitet për vrasjen e Agim Veliut e shumë të tjerëve”, nis rrëfimin e tij z. Bllaca. I pyetur se a ka vrarë ai Xhemajl Mustafën, Tahir Zemajn, Bllaca thotë se nuk ka qenë i përfshirë në këto vrasje, por si strukturë e këtij shërbimi thotë se është autor i një vrasje, por ajo mbetet të dëshmohet në Prokurorinë e EULEX-it. Ai thotë se prokuroria e EULEX-it është ë njohur për vrasjet që ai i ka kryer. “Shefi mbi mua ka qenë Shpresim Uka, dhëndër i Azem Sylës dhe kemi punuar në një strukturë vijë vertikale ashtu siç duhet. Nuk kemi qenë shumë, në rrethin tonë kemi qenë 3 persona, të gjithë tashmë të njohur për Prokurorinë”, thonë ai, ndërsa shton se lista për të eliminuar njerëz të caktuar i ka ardhur nga eprori i tij. “Mua lista më ka ardhur nga eprori im Shpresim Uka. Kam dëshmi për të gjitha, posedoj edhe audio dhe video incizime që janë marramendëse, incizime duke marrë pjesë në aksione. Të gjitha i janë dorëzuar Prokurorisë. Unë kam punuar nën koordinatën e Azem Sylës. Kam qenë pjesëmarrës në 17 raste. Bëhet fjalë për vrasje, plagosje, kërcënime, shantazhe, rrahje brutale etj”, ndërsa nuk ka precizuar se kush është personi që ai personalisht e ka varë, duke thënë se këtë informatë e ka Prokuroria e EULEX-it. Bllaca thtoë se ka qenë i pa vetëdijshëm për atë që ka bërë, duke menduar se në këtë formë po i shërben atdheut. “Kam menduar se jam duke punuar mirë për atdheun, por ajo kishte qenë krejt diçka tjetër, që është bërë nga individë dhe klane të ndryshme të cilat nuk ia kanë dashur të mirën tjetrit. Kanë thënë se ata njerëz të caktuar i kanë shërbyer UDB-së. Por në fund doli e kundërta e asaj që është thënë. Po e marr shembull kanë thënë se Ali Sadriu shërben për Shërbimet e fshehta të Beogradit apo dikujt tjetër, apo Adem Saljhai dhe këta i kemi futur me një ‘thes’ me Selim Broshën dhe Ibush Kllokoqin”, thotë Bllaca.

Jam penduar për punën që kam bërë

Ai nuk di nëse për këto raste kanë qenë të njoftuar udhëheqësit e shtetit. “Këtu nuk mund të implikoj kryeministrin. Unë nuk kam të bëjë asgjë me Hashim Thaçin, Fatmir Limaj apo Presidentin”, thotë ai. Bllaca ka rrëfyer edhe për takimet që Azem Syla i ka mbajtur me strukturat e SHIK-ut në vitin 2007, ku ishin ofruar 100 mijë euro për të likuidimin e tij. “Më 20 gusht 2007 nga i njëjti grup kriminal është përgatitur likuidimi im, ku edhe janë dhënë 100 mijë euro dhe për këtë është e njohur edhe Prokuroria e EULEX-it. Kam dhënë një deklaratë në stacionin numër 2, por ajo deklaratë imja pas 20 minutash ka dalë nga stacioni. Tash kam vendosur të flas sepse është koha. Siç po shihet edhe Prokurorët e EULEX-it janë të interesuar t’i dalin kësaj çështje deri në fund”, thotë ai, ndërsa thekson se të njëjtën gjë ka dashur ta bëjë edhe në vitin 2007. “Kam dashur të dëshmoj për të gjitha ato që janë bërë duke u bazuar në organet e mirëfillta të EULEX-it. Fillimisht në gusht të vitit 2007 kam dashur të flas, por duke u bazuar në të kohë që UNMIK-u ishte jo stabil jam detyruar të largohem nga Kosova”.

Ai, ka pohuar se urdhërdhënësit për vrasje janë ministra dhe zv.ministra, por nuk ka precizuar asnjë nga ata emra, duke thënë se emrat janë të njohur për EULEX-in.

Duke qenë personi i parë që del hapur për të dëshmuar për krimet e bëra, ai thotë se në asnjë moment nuk do të tërhiqet nga deklarimet e bëra dhe se është i gatshëm të paguaj me çmim gjithë atë që ka bërë, ndërsa për të gjitha të bërat e tij, ai thotë se ka qenë në dijeni edhe familja. “Jo absolut nuk tërhiqem. Unë jam personi i parë në Kosovë që pas luftës dal haptas. Po normal se unë jam penduar për punën që kam bërë nga viti 1999. Barra ime sa më bien jam i interesuar ta paguaj. Kam tre fëmijë dhe gruan, jetojmë të gjithë në Kosovë. Edhe po të vritem nga ky vend njerëzit do të kapen, dhe për këtë do të marr vesh edhe Brukseli sepse janë çështje madhore. Unë ua njoh strukturën e vrasjeve dhe mua nuk e kanë lehtë të më qesin në kurth”, shprehet Bllaca. Ai thotë se Azem Syla dhe njerëzie tij i kanë ofruar edhe të holla për të tërhequr dëshmitë. “Më 13 tetot 2009 nuk kemi mund të arrijmë kompromis me Azem Sylën rreth këtyre çështjeve. Në takimin që kam pasur me grupin kriminal të Azem Sylës nuk kemi arritur të gjejmë kompromis. Jam takuar me Azem Sylën që ata të mi japin disa të holla dhe unë të tërhiqem nga të gjitha. Fillimisht më kanë ofruar 400, pastaj 600 mijë euro, nëse unë largohem nga mediat, EULEX dhe partitë opozitare. Njerëz të Azem, Sylës më kanë thënë se nëse tërhiqem nga deklarimet do të më ndihmojnë me miliona dhe ky takim është mbajtur në Drenicë”, thotë ai, ndërsa shton se për mos pranimin e tërheqjes së tij pas publikimit të CD-së në Parlamentin e Kosovës të premten më 27 nëntor në orën 19:00 ndaj tij është përgatitur atentati i dytë.

Ai thotë se ka zgjedhur Gani Gecin për t’ia rrëfyer të bërat e tij, nisur nga fakti se Geci është anëtarë i komisionit për siguri në Parlament, dhe jo se ka qenë ithtar i LDD-së. Geci: Dëshmitari tregon se kush e ka gjakosur Kosovën Deputeti Gani Geci, shpjegon se si ka ardhur deri të kontakti me dëshmitarin, duke thënë se fillimisht kanë biseduar në telefon e pastaj e ka ftuar z. Bllaca që të takohen në Skenderaj. “Ka filluar të rrëfejë dëshmi aq rrëqethëse sa që unë s’kam besuar, sepse më është dukur si nëpër filma. Pastaj kemi shkuar të Adem Salihaj dhe jemi takuar në një kafiteri në Ferizaj dhe gjatë rrëfimit dëshmitari ka shprehur gatishmërinë për t’u incizuar në CD. Ky dëshmitarë tregon se kush është para politika dhe kush e ka gjakosur Kosovën. Nuk është patriotizëm me dhanë urdhër dhe me vra axhën e vet që ka punuar në arsim. Urdhërdhënësit janë në hierarkinë e institucioneve”, thotë Geci.

Edhe Adem Salihaj, thotë se në nuk është strukturë që ka zhvilluar ndonjë hetim, por se ka qenë një viktime e krimit të organizuar në Kosovë. “Jam munduar me vite të zbardhë të vërtetën lidhur me tentim-vrasjen dhe dëshmia që ka ardhur te unë që ka rrëfyer edhe për rastin tim, ka ardhur nga një peron që kurrë se kam njohur. Jemi marrë vesh që ta filmojmë me kamera atë dëshmi. Në këtë CD janë shumë përgjigje për shumë vrasje në Kosovë. Janë përgjigje për një krim të organizuar për sektorin e organizuar të SHIK-ut dhe flitet për një person që ka qenë pjesë e sektorit të vrasjeve që ka rrëfyer për atë pjesën që e di ai. Janë përgjigje jo vetëm për rastet që janë përmendur konkretisht, por edhe për rastet që nuk janë përmendur, sepse urdhërdhënësi është i njëjti për të gjitha vrasjet në Kosovë. Këtu janë përgjigjet për tentim-vrasje ndaj Agim Veliut, Ejup Visokës, Gani Gecit, dhe ndaj meje. Këtu janë përgjigjet për vrasjen e Xhemajl Mustafës, Enver Malokut, Ukë Bytyçit, Shaban Manajt, Tahir Zemajt, Besim Dajakut, Bekim Kastratit, Sebahate Tolaj, etj”, thotë ai. Salihaj është i bindur se Kosova nuk mund të ecë përpara me këta njerëz dhe këto institucione, ndërsa kërkon nga mekanizmat përkatës që të gjejnë mënyrën që mos të sundojë krimi dhe mafia politike. Sa i përket Sigurimit të Atdheut, Salihaj mohon të ketë qenë ndonjëherë pjesë e kësaj strukture ilegale. “SHIK dhe PDK kanë tentuar të konstruktojnë një akuzë kinse unë kam lidhje me Sigurimin Atdheut, por them se s’kam asnjë lidhje. Ndoshta ekziston Sigurimi i Atdheut dhe besoj se e njëjta strukturë qëndron prapa këtij shërbimi dhe s’kam asnjë lidhje me këtë. E ardhmja do të tregoj se kush është i lidhur me krim e kush jo dhe shumë gjëra do të dalin në shesh. Ne sot ndjemi të rrezikuar, por megjithatë kemi vendosur që të plasojmë të vërtetën”, thotë ai, ndërsa thekson se tashmë edhe EULEX-i ka dëshmi konkretet që flitet me emra dhe mbiemra.

Gazeta: Kosova Sot : Rrëfehet publikisht për vrasjet Nazim Bllaca, policia dhe EULEX-i heshtin Nazim Bllaca, nga Ribari i Madh, doli në qendër të Prishtinës, e deklaroi veten si ish-anëtar i SHIK-ut, tha se ka vrarë e maltretuar, ka marrë urdhra nga Azem Syla, si epror i tij, dhe pas këtyre fjalëve vazhdoi të mbetet i lirë. Policia dhe Prokuroria nuk ndërmorën asgjë, ndërsa EULEX-i thotë se po e heton rastin. Azem Syla i ka quajtur gënjeshtra pohimet për të, ndërsa PDK-ja reagoi dhe kërkoi angazhim maksimal të EULEX-it 30 Nëntor, 2009

Dëshmitari i shumëpërfolur i CD-së, ish-pjesëtar i SHIK-ut, Nazim Bllaca, i lindur më 1972, nga Ribari i Madh i Lypjanit, të dielën në sheshin në afërsi të Kuvendit është shfaqur befasishëm para medieve, duke shpalosur të dhënat e tij për disa krime të kryera në Kosovë. Ai tha se ka qenë punonjës i SHIK-ut dhe se ka marrë pjesë në organizimin e vrasjeve dhe tentim vrasjeve nga qershori i vitit 1999 deri në vitin 2003. “Nën urdhrat e SHIK-ut kam marrë pjesë në 17 aksione për vrasje, plagosje, rrahje e shantazhe. Eprori im ka qenë Azem Syla dhe dhëndri i tij, Shpresim Uka. Nga ky i fundit i kam marrë emrat se kush duhet të ekzekutohet”, ka thënë Bllaca, për të cilin policia nuk ka ndonjë urdhërarrest. Bllaca ka thënë se që nga viti 1995 deri më 1998 ka punuar në arsim në shkollën fillore ‘Emin Duraku’ në Shtime, e më pas në fshatin e tij të lindjes, ndërsa në vitin 1998 i është bashkëngjitur radhëve të UÇK-së, në zonën e Pashtrikut, deri më 12 qershor viti 1999, ndërsa pas kësaj kohe ka deklaruar se ka qenë i angazhuar në strukturat e SHIK-ut.   Më ofruan 600 mijë euro për heshtje Bllaca në rrëfimin e tij tha se dëshminë e tij e ka të incizuar në një video, e cila medieve u është shpërndarë nga deputetet Gani Geci dhe Adem Salihaj. Sipas tij, CD-ja e cila është dorëzuar në Kuvendin e Kosovës nuk ka të bëjë me periudhën e luftës, dhe, sipas tij, CD-ja i qartëson disa gjëra të cilat janë manipuluar në adresën e tij. “Është e vërtetë që bëhet fjalë për vrasje dhe për vrasje në nivel të Kosovës, jo në nivel komunal”, tha ai, duke theksuar se në këto struktura në rrethin e ngushtë kanë qenë vetëm tre persona. Ai nuk e di nëse funksionon SHIK-u dhe as që e njeh Kadri Veselin. Më tej ai shfaqi besimin se shumë shpejt do të dalin edhe të tjerët. “Mjaft ka shkuar me ata dëshmitarët e fshehtë”, tha ai. Bllaca ka bërë të ditur se i janë ofruar edhe shuma të mëdha parash, prej 400 mijë deri në 600 mijë euro, vetëm e vetëm që të mos i bëjë publike vrasjet. “Po, normal jam i penduar për punën që është bërë nga 12 qershori i vitit 1999. Nuk është problem barra ime sa më bie, unë jam i interesuar ta paguaj”, tha Bllaca.  Në video përmenden edhe 100 mijë euro për vrasjen e tij. “Është fjala për 20 gushtin e 2007-s, ku janë dhënë 100 mijë euro për vrasjen time. Prokuroria e EULEX-it është në dijeni se kush i ka dhënë parat dhe nga cili individ”. I pyetur çfarë e ka shtyrë të paraqesë para opinionit të gjitha ato që i thotë, Bllaca ka thënë se një nga motivet është se nuk ka arritur kompromis me ish-shefin e tij, prandaj ka vendosur të dalë para medieve dhe t’ua japë videon prej 30 minutash. Bllaca thotë se u ka shërbyer këtyre strukturave duke menduar se është duke punuar për atdheun, por që, sipas tij, ajo kishte qenë krejtësisht diçka tjetër prej individëve dhe klaneve të ndryshme. Ai thotë se për njerëzit që kanë cak të sulmeve është menduar se janë njerëz të caktuar të UDB. “Ashtu janë thënë, por në fund doli krejt e kundërta prej asaj që është thënë”, tha Bllaca, duke theksuar se të gjithë i kanë futur në një korpë me Selim Broshin dhe Ibush Klokoqin”. Bllaca ju tha gazetarëve se ai nuk ka marrë para ekstra për vrasje, por vetëm një rrogë mujore prej 150 eurosh. Për ato 4 vjet që ka shërbyer në SHIK ka qenë i bindur se duke kryer këto vrasje po i shërben atdheut.   Largimi nga Kosova Më tej ai ka thënë se është përcaktuar që CD-në ta publikojnë Adem Salihu dhe Gani Geci, duke qenë që ky i fundit ka qenë anëtar i komisionit për çështje të sigurisë në parlament. Bllaca ka thënë para medieve se të premten dhe të shtunën tek ai kanë qenë Policia e Kosovës, por nuk është prononcuar. Ai tha se është i gatshëm të shkojë në burg për atë që ka bërë. Bllaca tha se nuk ka besim të plotë në organet policore të Kosovës për të paraqitur dëshminë e tij, prandaj ka pritur misionin e EULEX-it, ku edhe ka deponuar faktet që ka në dispozicion.“Duke u bazuar në organet e mirëfillta të EULEX-it, unë e kam bërë një parapërgatitje në fillim në gusht të vitit 2007. Mirëpo, duke u bazuar në atë kohë që UNMIK-u ka qenë jostabil, atëherë jam detyruar të largohem nga Kosova. Rasti i së premtes është rasti i dytë që ka ndodhur ndaj meje. Përndryshe, më 20 gusht 2007 është përgatitur nga i njëjti grup kriminal që të likuidohem. Kam dhënë edhe një deklaratë në stacionin 2 në vitin 2007, e cila deklaratë pas 20 minutave ka dalë nga stacioni dhe është përhapë”, tha Bllaca. Ai gjithashtu implikon persona të lartë të Policisë së Kosovës. “Unë jam personi i parë në Kosovë që dal pas lufte haptas. Kanë qenë tek unë të premten dhe të shtunën, mirëpo unë nuk jam prononcuar para SHPK-së, nuk e kam që nuk ju besoj, ka edhe aty djem të mirë, por EULEX-it ia kam dorëzuar CD-në dhe audion e 13 tetorit 2009”, tha Bllaca. Ai tha se asnjëherë nuk ka biseduar me kryeministrin aktual të Kosovës, Hashim Thaçin, dhe nuk beson se ky i fundit ka qenë në dijeni për vrasjet që urdhëroheshin nga SHIK-u. Por, ai përmendi se për aksionet e kryera ka marrë urdhra nga, siç tha ai, “pjesëtarë të SHIK-ut, që gjenden në strukturat udhëheqëse të Partisë Demokratike të Kosovës, pa përmendur asnjë emër. “Janë të precizuar dhe për EULEX-in janë të njohur”, tha Bllaca. Ndërsa, zyrtarët e Policisë së Kosovës kanë thënë se policia është e gatshme të veprojë dhe të reagojë kur prokuroria të lëshojë urdhrin për çfarëdo që të jetë. Mirëpo, Bllaca thotë se me këtë rast po merren hetuesit e EULEX-it. “Rasti deri më tani është nën hetime të Prokurorisë së EULEX-it dhe është në partneritet të plotë me EULEX-in, dhe pret komentet dhe urdhrin të veprohet në bazë të urdhëresave”, ka theksuar ai.   Syla: Janë shpifje dhe gënjeshtra, do ta denoncoj Bllacën  Një nga emrat e përfolur nga Bllaca ka qenë edhe ai i Azem Sylës, i cili ka reaguar në televizionin publik, duke hedhur poshtë ato. Syla i ka quajtur gënjeshtra pohimet për të. “Nuk merrem me gënjeshtra, shpifje dhe intriga të njerëzve të ligë, e aq më pak kur këto gënjeshtra bëhen në kohë fushatash”, pohoi Azem Syla për RTK-në. Ai tha se Bllacën nuk e njeh. “Emrin tim dhe Azem Sylën e njeh tërë populli i Kosovës që nga vitet e 70-ta, do të thotë tërë një jetë të timen ia kam kushtuar popullit tim, vendit tim dhe të ardhmes së vendit. Këto shpifje në këto momente janë edhe gjatë kohës së fushatës. Personat të cilët në Kuvend dhanë deklarimet e tyre dhe personi sot në fjalë të gjitha janë shpifje dhe intriga që i bëjnë njerëzit e ligë”, tha ai, duke shtuar se tërë veprimtarinë dhe aktivitetin e tij, duke përmendur këtu vuajtjen në burg në vitet 80 pastaj 89 në izolim dhe gjatë luftës e tani ka qenë për shtet dhe forcim të shtetit të Kosovës. Syla tha se këto akuza, që sipas tij bëhen në kohën e fushatës, janë shpifje të llojit të tyre. “Që nesër do ta denoncoj në organet e policisë, t’i lihet drejtësisë e cila le ta thotë fjalën e vet”, tha Syla. Ai tha se nuk e di se çfarë e ka shtyrë Bllacën të përmendë emrin e tij. “Janë shpifje dhe kanë me dalë shpifje”, tha Syla. Ndërsa, Partia Demokratike e Kosovës dje hodhi poshtë akuzat, duke thënë se me këtë rast duhet të merren organet kompetente. Zëdhënësi i Partisë Demokratike të Kosovës, Blerand Stavileci, tha se ky subjekt do të pozicionohet në mënyrë të përgjegjshme, ndërsa kërkoi që deklaratat e ndryshme të partive të mos bëhen për përfitime të personave politike pak ditë para balotazhit, që do të mbahet më 13 dhjetor. PDK-ja kërkon angazhim maksimal të EULEX-it “Vendi dhe populli ynë kanë dhënë shumë për të ngritur shtetin dhe institucionet e veta demokratike. Liria, siguria dhe shteti ligjor janë kualitete themelore të demokracisë dhe të vendit tonë”, thuhet në një komunikatë shtypi të PDK-së, lidhur me zhvillimet rreth rastit të CD-së. “Të nderuar qytetarë, ditëve të fundit jemi dëshmitarë të akuzave dhe fyerjeve që bëhen në rrugë joligjore dhe me motive elektorale. Ka tendenca nga individë të inkriminuar që përpjekjet tona për shtet ligjor t’i kthejnë në anarki, urrejtje dhe vëllavrasje”, thuhet më tej në komunikatë. PDK-ja përmes komunikatës fton tërë opinionin e gjerë politik, intelektual dhe moral të vendit tonë që t’i japin përgjigjen e merituar tendencave të tilla nga individë të kriminalizuar me vendosmëri, jo anarkisë, jo krimit dhe jo vëllavrasjes. “I thërrasim dhe u japim përkrahje të plotë organeve të drejtësisë në zbardhjen e së vërtetës dhe t’i japin fund tendencave për shkatërrim dhe denigrim të sistemit tonë të drejtësisë, me qëllim të zhdukjes së të  vërtetës dhe mbulimit të krimit”. Partia Demokratike e Kosovës do të kërkojë zyrtarisht nga EULEX-i angazhim maksimal dhe shqyrtim të plotë e të shpejtë të këtyre akuzave të përfolura dhe vënien e drejtësisë në vend. Partia Demokratike e Kosovës fton qytetarët të besojnë në organet vendore dhe ndërkombëtare të drejtësisë dhe të mos bien pre e akuzave të ulëta e të pabaza me prapavijë elektorale”, thuhet në komunikatën e PDK-së.

Nazim Bllacës, 30 ditë arrest shtëpiak

Gjykatësi ndërkombëtar i procedurës paraprake, Francesko Florit, ka marrë vendim që të akuzuarit Nazim Bllaca t’i shqiptohet masa e arrestit shtëpiak prej 30 ditësh. Këtë e ka konfirmuar Haxhi Millaku, avokat mbrojtës i të akuzuarit.

Me këtë vendim, gjyqtari ka pranuar kërkesën e avokatit Millaku dhe ka hedhur poshtë kërkesën e prokurorit Mauricio Salustro, i cili propozoi që Bllacës t’i shqiptohet masa e paraburgimit prej 30 ditësh.

Avokati Millaku gjithashtu ka kërkuar që klientit të tij t'i bëhet ekzaminim mjekësor psikiatrik. "Janë dy kapituj veprash, krim i organizuar, vrasje e rëndë dhe vrasje në tentativë, si vrasje e rëndë në tentativë. Do të shohim sa janë valide, sa është aplikuar ligji, mënyra...Unë kërkova nga gjykatësi që të bëhet gjithsesi ekzaminimi mjekësor, sepse deri më tani ai nuk ka pasur një trajtim mjekësor adekuat, a kemi të bëjmë me njeri normal, apo për çka është fjala?”, ka thënë Millaku.

Azem Syla, anëtar i Kryesisë së PDK-së dhe ish-komandant i Shtabit të Përgjithshëm të UÇK-së, ka ngritur kallëzim penal ndaj Nazim Bllacës nga Ribari i Madh i Lipjanit, i arrestuar dje nga Policia e Kosovës.

“Në kuptim të dispozitës së nenit 198 al.1 të Kodit të Procedurës Penale të Republikës së Kosovës (KPPK) dhe duke ju bashkangjitur njoftimin tim për media të datës 30.11.2009 paraqes kallëzim penal për të gjitha veprat penale që ndiqen sipas detyrës zyrtare e që i ka kryer Nazim Bllaca nga fshati Ribar i Madh - Komuna e Lipjanit, i cili më 30.11.2009 është arrestuar nga Policia e Kosovës”, thuhet në kërkesën drejtuar Prokurorisë Publike të Qarkut në Prishtinë (Kryeprokurorit Osman Kryeziu) dhe Prokurorisë Speciale të Republikës së Kosovës në Prishtinë (Kryeprokurores Elisabeth Arnal).

Syla, i cili është apostrofuar nga Bllaca si urdhërdhënës i tij në një numër rastesh të vrasjeve dhe tentimvrasjeve, që sipas tij janë organizuar nga SHIK-u në periudhën e pasluftës, kërkon nga prokuroria ta njoftojë mbi epilogun e hetimeve zyrtare nga ana e saj.

“Arsyeja e kërkesës sime që të më njoftonin mbi epilogun e hetimeve të juaja zyrtare është që pas përfundimit të hetimeve zyrtare kundër Nazim Bllacës, unë do të ndërmarr veprime të caktuara juridike dhe ligjore në mbrojtje të dinjitet tim, për shkak të shpifjeve dhe gënjeshtrave të cilat me deklarimet e tij më 29.11.2009 i ka plasuar në media-opinionin kosovar, i paraqituri”.

Syla e ka autorizuar avokatin Tomë Gashi që ta përfaqësojë në Prokurorinë Publike të Qarkut në Prishtinë, Prokurorinë Speciale të Republikës së Kosovës në Prishtinë, në të gjitha gjykatat kompetente në Kosovë në çështjen penale kundër Nazim Bllacës.